જાળવી રાખજે - ચિરાગ ઠક્કર 'જય'

ખુલ્લી નહિ, તો બંધ આંખોની શરમ જાળવી રાખજે,

પ્રેમ નહિ પ્રેમનો મોહક ભરમ જાળવી રાખજે.

ભલે ન સમજી હો આ દિલની વ્યથાના મતલબને,

રાખી મૌન વાતનો મોઘમ મરમ જાળવી રાખજે.

નહિ મળે મિલનના મોકા મુહબ્બતમાં વારંવાર,

થાય જો ઝાંઝવાનો તરસ્યો સંગમ, જાળવી રાખજે.

ન ગમતી હો જીવનની ક્ષણભંગુરતા પ્રિયતમ,

બંધ આંખે આપેલ શાશ્વત ચુંબન જાળવી રાખજે.

‘જયે’ વિચાર્યા વિના આપી દીધું તને પાષાણ-હ્રદયી, 

લાગણી સભર મારું દિલ નરમ, જાળવી રાખજે.

યુ.કે. બાઇટ્સઃ આ વખતનો વર્લ્ડ-કપ

આ વખતનો વર્લ્ડ-કપ મારા માટે અલગ છે. છેલ્લા વર્લ્ડ-કપ વખતે હું અતિ-વ્યસ્ત હતો માટે એક પણ મેચ જોઈ નહોતી (સારુ થયું.) પણ આ વખતે આપણી મોટા ભાગની મેચ વીક-એન્ડમાં છે અને હું ત્યારે ઘરે જ હોઉં છું. ઉપરાંત ઇન્ટરનેટ પર સ્ટ્રીમીંગ પણ સરળતાથી જોવા મળી જાય છે.

                  બીજી નવી વાત એ છે કે અત્યારે હું જ્યાં કામ કરુ છું ત્યાં ભારતીય ઉપરાંત બાંગ્લાદેશી, પાકિસ્તાની, શ્રીલંકન, વેસ્ટ-ઇન્ડિયન, કેન્યન, ઇંગ્લિશ અને આઈરીશ વ્યક્તિઓ પણ છે. માટે ત્યાં પહોચતા જ અલગ-અલગ દેશના સમર્થક સાથે વાતો કરવાનો મોકો મળે છે અને નવી-નવી વાતો જાણવા મળે છે. બાંગ્લાદેશી મિત્રો આ વખતે ખૂબ ઉત્સાહમાં છે અને તેમને પૂરો વિશ્વાસ છે કે તેમનો દેશ બીજા-તબક્કામાં તો જરૂર પહોચશે. પાકિસ્તાની મિત્રોની વાતો લાક્ષણિક હોય છે. જીતે તો ‘અચ્છા ખેલે’ અને હાર્યા તો ‘મેચ ફિક્ષ હૈ!’. મતલબ કે તેમને બુકી સિવાય કોઈ ટીમ હરાવી શકે નહિ! શ્રીલંકનો ભાગ્યે જ તેમના દેશની ટીમ માટે સારુ બોલે છે કારણ કે તેઓ તમિલ છે અને ટીમના મોટા ભાગના ખેલાડીઓ સિંહાલી છે. વેસ્ટ-ઇન્ડિયન અને કેન્યન મિત્રો તેમની ટીમના પ્રદર્શનથી નિરાશ છે અને કદાચ આ પેઢીને ક્રિકેટમાં તેટલો રસ નથી. ઇંગ્લિશ મિત્રોનું પણ એવું જ છે. તેમને ફૂટબોલમાં છે તેનાથી દસમાં ભાગનો પણ રસ ક્રિકેટમાં નથી. આઈરીશ મિત્રને તો એ પણ ખબર નહોતી કે તેમની આંતરરાષ્ટ્રીય સ્તરની એક ક્રિકેટ-ટીમ છે અને તેઓ આ વર્લ્ડ-કપમાં રમવાના છે. જ્યારે એક ઈટાલીયન મિત્રને તો ક્રિકેટ જોઈને નવાઈ લાગી હતી કે ‘આ રમત તો વિચિત્ર છે. કંઈ ખબર જ નથી પડતીને!’ 

યુ.કે. બાઇટ્સઃ Ubiquitous UK (21-2-11 to 25-2-11)

અહિ લંડનમાં સવાર અને સાંજ એક-એક વર્તમાનપત્ર વિનામૂલ્ય વહેંચવામાં આવે છે. સવારે ‘મેટ્રો’ અને સાંજે ‘ઇવનિંગ સ્ટાન્ડર્ડ’. બંનેના કલેવર અલગ-અલગ છે પણ બંનેના ‘ટારગેટ રીડર્સ’ સમાન જ છે અને તે છે કમ્યુટર્સ (આપણી ગુજરાતીમાં રોજે-રોજ નોકરી માટે જન-પરિવહનમાં ‘સફર’ કરનારા ‘અપ-ડાઉનિયા’). આ બંને વર્તમાન પત્રો સોમ થી શુક્ર જ પ્રકાશિત થાય છે કારણ કે મહત્તમ કમ્યુટર્સ પણ તે પાંચ દિવસ જ હોય છે. ‘મેટ્રો’ તો ઘણા વર્ષથી વિનામૂલ્ય ઉપલબ્ધ છે અને ઘણું જ લોકપ્રિય પણ ખરું. તેમાં તમામ પ્રકારના વાંચકોને રસ પડે તેવા વિવિધ સમાચાર છપાતા રહે છે. તે ટેબ્લોઇડ સ્વરૂપે કાગળ પર, ઈ-પેપર સ્વરૂપે ઈન્ટરનેટ પર અને એપ્લિકેશન તરીકે આઈફોનમાં મળી રહે છે. તેમાં ૨૧ ફેબ્રુઆરી થી ૨૫ ફેબ્રુઆરી ૨૦૧૧ દરમિયાન છપાયેલ રસપ્રદ સમાચારોઃ

• પાંચેય દિવસ પ્રથમ પૃષ્ઠ પર લિબિયા અને કર્નલ ગદ્દાફી જ છવાયેલા રહ્યા. જોકે ન્યુઝીલેન્ડના ભૂકંપનો એક ફોટો આવ્યો ખરો પણ મુખ્ય સમાચાર તો લિબિયાના જ રહ્યા. ગદ્દાફીના રાષ્ટ્રના સંબોધનને બધાએ કેટલી ‘ગંભીરતા’થી લીધું તેને લગતું એક કાર્ટૂન.

• અહી ઘરમાં ટી.વી. રાખવા માટે લાયસન્સ લેવું પડે છે(!?) અને સામે તમને જાહેરાતોના ધોધમાંથી શક્ય એટલા બચાવવામાં આવે છે તેવો બ્રિટિશ બ્રોડકાસ્ટિંગ કૉર્પોરેશનનો દાવો છે. હમણાં એવા સમાચાર આવ્યા કે હવે ખાનગી ચેનલો ચોક્કસ પ્રકારના કાર્યક્રમો દરમિયાન પ્રતિ કલાક ૭ ના બદલે ૧૨ મિનિટ જાહેરાતો બતાવી શકશે. ભારતમાં દર્શકોના હિત સાચવતો આવો  કોઈ કાયદો ખરો?

• British FTSE-100 સમૂહમાં આવતી કંપનીઓએ એવું લક્ષ્ય નિર્ધારિત કર્યું છે ઇ.સ. ૨૦૧૫ સુધીમાં તેમના ઉચ્ચ અધિકારીઓમાં ૨૫% સ્ત્રીઓ હોવી જ જોઈએ. ભારતના ૩૩% સ્ત્રી અનામત વિધેયક જેવું લાગે છેને?

•  પ્રતિ વર્ષ નવેમ્બર માસમાં બ્રિટિશ શહીદોની યાદમાં ‘પોપી’સ અપીલ ડે’ ઊજવાય છે અને લોકો પોતાના વસ્ત્ર પર કુદરતી કે કૃત્રિમ પોપી (એક પ્રકારનું ફૂલ) લગાવે છે. વર્ષ ૨૦૦૯ માં કેટલાક મુસ્લિમોએ તેનો વિરોધ કર્યો હતો અને ઉશ્કેરણી જનક સૂત્રો વાળા પોસ્ટરો જાહેરમાં પ્રદર્શિત કર્યા હતાં. તેમાંના ચાર વ્યક્તિઓ પર જનતામાં ઉશ્કેરણી ફેલાવવા બદલ અને ભેદભાવ ભર્યું વર્તન કરવા માટે કેસ દાખલ થયો હતો. પાછળથી એ વાત બહાર આવી કે એ ચારેય વ્યક્તિઓ અહિની સરકાર જોડેથી વિવિધ પ્રકારની નાણાકીય મદદ (અહિની ભાષામાં Benefits) મેળવીને જ જીવતા હતા, કોઈ નોકરી-ધંધાની આવક પર નહિ. જે થાળીમાં ખાવું, તેમાં જ થૂંકવું! તેમને જો આટલું બધું લાગી આવતું હોય તો તેમના દેશમાં પાછા જઈને ત્યાં કોઈ નક્કર પરિવર્તનો લાવવાની દિશામાં કામ કેમ નથી કરતાં?

• એક રસપ્રદ સમાચાર એવા પણ હતાં કે એક ૯૬ વર્ષની અમેરિકન મહિલા (ડોસી લખાય તેમ નથી, કારણ કે તે શબ્દ સમાચારને અનુરૂપ નથી!) રૂપજીવિની તરીકે કામ કરીને વર્ષના £૫૦,૦૦૦ (એટલે કે લગભગ ` ૩૫ લાખ) કમાય છે અને તેનો પાછલા ૬૦ વર્ષનો ઈતિહાસ પણ છાપ્યો છે. તે એક કૉલના £૮૦૦ લે છે. અહિ પાંચ દિવસ ફુલ-ટાઈમ કામ કરનાર સરેરાશ વ્યક્તિની માસિક આવક, કર-કપાત પછી, £૮૦૦ની આસપાસ હોય છે, તે જાણકારી માટે.

• આ અઠવાડિયામાં ભારતને લગતા ત્રણ સમાચાર છપાયા હતા. અઝમલ કસાબનો ચૂકાદો અતિ સંક્ષેપમાં, ચરિત્ર અભિનેતા ઓમપુરીનું બે કોલમમાં ઈન્ટર્વ્યૂ અને દર શુક્રવારે બોલિવુડના સમાચાર પીરસતી નાનકડી નિયમિત કોલમ ‘બોલી સ્પાઈસ’.

• અંતિમ ૬ થી ૧૨ પાના રમત-ગમતના સમાચારના હોય છે પણ તેમાં મહદઅંશે ફૂટબોલ જ હોય છે. ક્રિકેટ વલ્ડ-કપના સમાચાર હોય છે ખરા પણ સંક્ષેપમાં- જો ઇંગ્લેન્ડ રમવાનું હોય તો એક પાનું અને ન રમવાનું હોય તો એક કોલમ.

• અંતમાં જરા મરક-મરક.

(તમામ ન્યુઝ-ક્લિપ્સ 'મેટ્રો' પરથી લીધેલ છે.)

સંપાદનઃ ચિરાગ ઠક્કર 'જય'