બની શકે! - ચિરાગ ઠક્કર 'જય'

photo © 2008 sudarshan vijayaraghavan | more info (via: Wylio)

કંટક તમને ચાહે ને ફૂલો આપે ડંખ, બની શકે!

ભોમિયા ભૂલા પડે નહિ, દગો આપે પંથ, બની શકે!

હોતી નથી પ્રાપ્તિ પ્રણયપંથની એક માત્ર મંઝિલ,

સૂરજ હોય મારો, પડછાયા છોડે સંગ, બની શકે!

શરમાય સુંદરતા આપના આગમનથી કદાચ,

કદાચ ઈન્દ્રધનુ ય વિસરે કોઈ રંગ, બની શકે!

સાગર કિનારે સહુ સદાય ભીંજાયેલા લથબથ,

ને હોય માંહી ડૂબેલાનું કોરું કોઈ અંગ, બની શકે!

કોરા કાગળમાંથી છલકાઈ ઊઠે પ્રેમ સંદેશાઓ,

ખળભળતા જગતમાંય મૌન સંબંધ, બની શકે!

કેમ થાય અભિવ્યક્ત લાગણી લઘુ-ગુરુ નિયમમાં?

ધસમસતા પ્રણયની ગઝલ નિસ્છંદ, બની શકે!

મળ્યા તમે ને સમજાઈ પ્રેમની પરિભાષા 'જય'ને,

એક આંખ હસે, બીજી આંખ રડે અનંત, બની શકે!