તાજેતરની પોસ્ટસ

October 27, 2010

ઇજન - ચિરાગ ઠક્કર 'જય'



આવ, લાગી જા ગળે,
કોઇ ખટારાગ નહિ રહે,
પલળી જા મુજ પ્રેમમાં,
કોઇ વિરાગ નહિ રહે.

ઓગળ મુજમાં
તું સબરસ બનીને,
રહે જીવનમાં
તું સમરસ બનીને.

ઉદિત થઇને આવ,
આવ નિશા બનીને,
છવાઇ જા જીવનમાં
દસ દિશા બનીને.

ખુશ્બુ બનીને
શ્વાસમાં મળજે,
સાથી બનીને
પ્રવાસમાં મળજે.

સંઘર્ષમય જીવનમાં
શક્તિ થઇ મળજે,
પ્રભુમય જીવનમાં
ભક્તિ થઇ મળજે.

સ્વપ્ન બનીને
તું આંખોમાં વસજે,
માળો બનીને
મુજ પાંખોમાં વસજે.

વસજે તું મુજમાં
મારો આતમ થઇને,
મળજે તું મુજને
મારો પ્રિતમ થઇને.

ઉત્તર તું મળજે
સાચા સ્વરૂપે,
અભિવ્યક્તિ બનજે
વાચા સ્વરૂપે.

હું રસ્તો છું,
મુજ મંઝિલ બનજે,
હું પ્રેમસાગર,
તું સાહિલ બનજે.

જીવનમાં મળજે
તું જીવન બનીને,
મુજમાં તું ખીલજે
ઉપવન બનીને.

નહિતર એ ઉપવનમાં
ક્યાંય પરાગ નહિ રહે,
સદાય તુજ કાજ જલતો
આ 'ચિરાગ' નહિ રહે.

આવ લાગી જા ગળે,
કોઇ ખટરાગ નહિ રહે,
પલળી જા 'જય' પ્રેમમાં,
કોઇ વિરાગ નહિ રહે.

-ચિરાગ ઠક્કર 'જય'

[આ રચના લખાઇઅ હતી ૧૯૯૯માં. તેને શું કહેવું - કવિતા, ગીત, ગઝલ કે નઝમ - તે ત્યારે ખબર નહોતી પડતી અને અત્યારે મૂંઝવણ થાય છે. તે વખતે મે 'જય' ઉપનામ પણ નહોતું અપનાવ્યું માટે તેમાં 'ચિરાગ' વાપરેલુ છે. 'જય' અત્યારે ઉમેર્યુ છે. આશા છે કે આપને એક કિશોરનો કલબલાટ ગમશે.]

No comments:

Post a Comment

આપને શું ગમ્યું ને શું ખટક્યું એ જરૂર કહેજો. આભાર.